|
بوُر مُشتاق زَشو تَش / وير بِسِيتي
|
اَسب كُميت شنگ وَر شوُ / گروُ قيمتي
|
|
زمينكهَ هوور هويزهَ / كُل داره گَزهَ
|
حاجي كلي دِيمهَ گريت/ چَقسْ وُ نَزهَ
|
|
آخمهَ سي اَسب وُزين/ بِرنوُ وِ شوُنيا
|
بَميرمِ سي پُشت كار / اوُ پَهلوُونيا
|
|
مَلهم لُري بيار / سي زخم جنگمِ
|
امروُ مهِ چَن روُزه / دير دوُ تفنگمِ
|
|
باوِرمِ مهِ وِ يناَ / سي قوُم لُرمِ
|
نياكانمِ دوُس دارمِ / بيشتر دِ جوُنمِ
|
|
كَسي ني تعريف بَكهَ / سينهَ وِ سينهَ
|
اوُ جنگ وُ اوُ روُزگار / وِ دلْ بَشينهَ
|
|
بِراروُ كمك بَكيت / دِ كار فرهنگ
|
كتووُي چاپ بَكنيمِ / ايما دِ اوُ جنگ
|
|
پيايا بي ادِعاَ / چي شير بيشهَ
|
چي فرهاد دِ بيستوُن / هِي ميزَن تيشهَ
|
|
اَسبيا كهَ نوُم آورِم / پيايا دلْ سوُز
|
كِيونوُ مَشگ وُ مُلاَر / آخمِ سي اوُ روُز
|
|
آخمهَ سي بِراري / كُهن پيايا
|
آخمهَ سي هورسبوُ / اوُ جوُل وُ جايا
|
|
سَنگريا دو نفري/ساختهَ وِ دوُور يك
|
دُشمنموُ دِ سر دارهَ / بَزنهَ پاتَك
|
|
تو بَنالْ اِ دلْ تنگ / سي دوُدِموُنت
|
شير پيايا كُل رَ تن/ پير وُ جوُونت
|
|
وِ ياد دلاوِريا / امروُ بَنالمِ
|
چي شاهين مين كَمَر / اشكسهَ بالمِ
|
|
كُجا رَت اوُ مال وُ بار/واردِهَ شفق باز
|
هم قطاريا كَسْ نَمَن / وا كي بَنيم راز
|
|
نَمَنهَ دوُ جنگجوُيا / كُر دو قطاري
|
دُشمنهَ دِ هويزهَ / بُردِن وِ خواري
|
|
دِ نِميايهَ وِ گوُشم / نالهَ تفنگي
|
وِ چَشيام دِ ندينمِ / مهِ چنوُ جنگي
|
|
نَمَنهَ اَسب كالهَ / وا زين وُ بَرگش
|
سوُارش پيا سگوند / اوُ دَس تفنگش
|
|
وِ دُنيا دِ نِميايهَ / كُر چنوُنهَ
|
دُشمنهَ تار وُ مار كِرد / تا دَر حوُنهَ
|
|
نَمَن دوُ تفنگچيا / تا وِش بنازمِ
|
كولاي بَرگ پينهَ / مهِ سيش بَسازمِ
|
|
هويزهَ خرووُ بيهَ / كُلش نيزارهَ
|
دالكهَ كُر سگوند / چَش انتظارهَ
|
